38 ár í eldhúsinu á Laugum og aldrei leiðst einn einasta dag

Birt 28. maí, 2026

Þegar fyrrum nemendur Laugaskóla eru spurðir út í skólagöngu sína er nær undantekningarlaust minnst á mötuneytið og þá sem þar starfa eða hafa starfað í gegnum tíðina. Það er því nokkuð vel rökstuddur grunur um að mötuneyti Laugaskóla sé ekkert venjulegt mötuneyti.

Matsalurinn er sannkallað hjarta skólans og sameiningartákn allra sem þar starfa og búa á matmálstímum. Salurinn er einnig mikið notaður utan matmálstíma, þar sem þar eru haldnar ýmsar samkomur fyrir nemendur, starfsmenn og gesti. Það má því með sanni segja að matsalurinn, ásamt Kristjáni og hans samstarfsfólki, sé stór og mikilvægur hluti af skólasamfélaginu – staður sem veitir ekki síður næringu fyrir sálina.

Mötuneytið endurnýjað árið 2017

Í mötuneyti skólans starfa fjórir starfsmenn í mismunandi stöðugildum, ásamt Kristjáni Guðmundssyni, yfirmanni mötuneytisins. Áhersla er lögð á að framfylgja stefnu skólans um hollustu, gæði og hreinlæti í matargerð og framreiðslu. Nemendur á heimavist eru í fullu fæði sem samanstendur af fimm máltíðum fimm daga vikunnar. Í boði er einnig sjö daga fæði eða að kaupa stakar máltíðir. Því ætti enginn að finna fyrir hungri í dagsins önn. Starfsmenn skólans geta keypt stakar máltíðir eða skráð sig í fastar máltíðir.

38 ár í eldhúsinu á Laugum og aldrei leiðst einn einasta dag

Ég er fæddur og uppalinn á Raufarhöfn, en þegar ég hóf störf við Laugaskóla kom ég úr allt öðru umhverfi – sjálfri Reykjavík. Ég þekkti skólann vel enda var ég sjálfur nemandi hér og leið einstaklega vel. Sú vellíðan varð raunar enn skýrari eftir að hafa búið í höfuðborginni um tíma.

Hvatning sem breytti lífinu

Ástæðan fyrir því að leið mín lá aftur í Laugar var fundur minn með Sigurði Viðari, stærðfræði- og íþróttakennara. Hann var einn besti kennari sem ég hafði haft á ævinni. Sigurður sagði mér að það stæði til að auglýsa eftir kokki við skólann og hvatti mig eindregið til að sækja um. Ég fylgdi ráðum hans, fékk starfið og hef ekki séð eftir því eina einustu sekúndu.

Hafþór stúdent með Rögnu kennara og eiginkonu Kristjáns

Einstakur staður og órjúfanleg fjölskyldubönd

Núna hef ég starfað við Laugaskóla í 38 ár og mér hefur hreinlega aldrei leiðst. Þetta er dásamlegur staður og nemendurnir sem hér ganga í gegn eru einstaklega góðir.

Laugaskóli er líka órjúfanlegur hluti af minni eigin fjölskyldu. Ég er kvæntur Rögnu Heiðbjörtu, íslenskukennara við skólann, og saman eigum við þrjú börn. Þau hafa öll lokið námi og útskrifast héðan. Það má því með sanni segja að öll fjölskyldan hafi útskrifast úr Laugaskóla!

FRÉTTASKRIF: SÓLBORG MATTHÍASDÓTTIR

Deila