Á fyrrihluta annarinnar eru eftirfarandi viðfangsefni tekin fyrir:
Sogæða- og ónæmiskerfin.
Orkukerfi líkamans (ATP-PCr, oxunarkerfið og sykurrofskerfið).
Áhrif umhverfisins á líkamann við þjálfun (þjálfun í hita, kulda og í hæð).
Áhrif þjálfunar á hjarta og beinagrindarvöðva.
Á seinni hluta annarinnar vinna nemendur viðamikið verkefni tengt viðfangsefnum úr öllum áföngum líffæra- og lífeðlisfræði mannsins.
LÍOL3LB05
Nemandi skal hafa öðlast þekkingu og skilning á:
hver orkukerfi líkamans eru, hvernig þau virka og hversu mikið þau afkasta
hvaða áhrif þjálfun í mismunandi umhverfi hefur á líkamsstarfsemina
hvernig hjartað starfar annars vegar í hvíld og hins vegar við álag
byggingu beinagrindarvöðva, hvernig þeir dragast saman og hvernig þeir stækka við langvarandi álag
Nemandi skal hafa öðlast leikni í að:
meta hversu mikið hvert orkukerfi er í virkni við mismunandi álag og mismunandi tímalengdir
átta sig á hvernig frumur ónæmiskerfisins vinna saman að því verkefni að vernda líkamann gegn sýkingum
Nemandi skal geta hagnýtt þá almennu þekkingu og leikni sem hann hefur aflað sér til að:
finna heimildir um viðfangsefnið á ensku
lesa og skilja heimildir um viðfangsefnið á ensku
meta gæði heimilda um viðfangsefnið
útskýra viðfangsefnið fyrir öðrum
taka þátt í umræðu um viðfangsefnið á uppbyggilegan hátt
Í áfanganum er viðhaft símat alla önnina. Öll verkefni gilda til einkunnar og þess vegna er það mikilvægt að nemendur stundi námið reglulega.