Heimavistarskóli í sveit

Sigurbjörn Árni skólameistari FL

Framhaldsskólinn á Laugum er öðruvísi framhaldsskóli sem býður upp  á einstaklingsmiðað nám þar sem vel er haldið utan um hvern og einn og námið sniðið að þörfum hvers og eins. Skólinn er lítill heimavistaskóli í sveit með um 100 nemendum sem flestir búa saman á heimavistum skólans. Skólinn býður upp á þrjár meginstúdentsbrautir, náttúruvísindabraut, félagsvísindabraut og íþróttabraut, auk kjörsviðsbrautar þar sem  nemendur geta sett saman stúdentspróf sitt sjálfir. Einnig er boðið upp á almenna braut fyrir þá sem ekki hafa náð lokaviðmiðum grunnskóla. Skólinn byggir upp á einstaklingsmiðuðu námi og hefst skóladagurinn kl 9:10 og  lýkur kl 15:30. Nemendur eru aldrei í eyðum heldur hefur hver nemandi sitt skrifborð í vinnustofu þar sem hann getur sinnt verkefnum og heimanámi þegar hann er ekki í fagtímum. Í þessum vinnustofum eru alltaf 2-3 kennarar sem aðstoða nemendur við verkefnavinnuna og heimanámið. Af þessum sökum eiga nemendur sem sinna náminu í vinnustofum ekki að  þurfa að sinna því eftir 15:30 á daginn. Vegna þess að námið er einstaklingsmiðað  geta nemendur farið  eins hratt eða  hægt í  gegnum  námið og  þeim hentar.

Mynd: Ragna Heiðbjört Þórisdóttir

Aðstaðan á Laugum er mjög góð. Heimavistarherbergin eru 20-25 fermetrar og eru öll útbúin með sérbaðherbergi.  Mötuneyti er á staðnum þar sem nemendur fá fimm máltíðir á dag fimm (eða sjö) daga vikunnar. Þvottahús er starfrækt innan skólans þar sem er þvegið er af nemendum og þau fá þvottinn samanbrotinn. Skólinn á sitt eigið íþróttahús, lyftingasal  og líkamsræktaraðstöðu og geta nemendur notað hana  að vild sér að kostnaðarlausu. Einnig er á staðnum  sundlaug, frjálsíþrótta- og knattspyrnuvöllur og golfvöllur og þurfa nemendur ekki  að greiða  fyrir aðgang að neinu af þessu. Þráðlaust internet  er í öllum húsum  skólans (þ.m.t. íþróttahúsinu) og er aðgangur að því ókeypis. Þar að auki er góður stuðningur við nemendur í gegnum leiðsagnarkennara (umsjónakennara), náms- og starfsráðgjafa, húsbændur á heimavistum og sálfræðingur kemur einu sinni í viku.

Félagslífið er vitanlega mikið og fjölbreytt eins og gengur og gerist þegar stór hópur  ungmenna er saman allan sólarhringinn. Hæst ber Tónkvíslina, tónlistarhátíð Framhaldsskólans á Laugum, sem fram fer í febrúar ár hvert og er söngkeppni skólans sem og grunnskólanna í nærliggjandi sveitarfélögum. Henni er sjónvarpað  beint á N4 og nemendur sjá um  allan undirbúning og framkvæmd og  skólahljómsveitin spilar  undir í lögunum. Árshátíð er haldin í nóvember með hefðbundnu árshátíðarsniði,  gala kvöldverði og skemmtiatriðum. Einnig eru haldnir smærri viðburðir, s.s. Laugadraumurinn þar sem nemendur leysa ýmsar þrautir í tvær vikur, vistakeppnir þar sem vistirnar keppa sín á milli í íþróttum sem og öðrum þrautum, karlakvöld og kvennakvöld, spilakvöld  og þannig mætti lengi telja. Þar fyrir utan er svo allt „óskipulagða“ félagslífið sem fylgir lífi á heimavist.

Framhaldsskólinn á Laugum er án efa eitthvað fyrir þig. Hikið ekki við að hafa samband við okkur og/eða koma og skoða aðstöðuna. Við hlökkum til að sjá ykkur

Sigurbjörn Árni Arngrímsson
Skólameistari

Dýrafræði

Nemendur í dýrafræði krufðu laxfiska mánudaginn 20. mars í verklegum tíma. Fiskarnir voru fengnir frá fiskeldinu á Laxamýri (einn regnbogasilungur og tvær bleikjur) og þökkum við þeim kærlega fyrir það! Fiskarnir voru svo ferskir að greina mátti hjartslætti í þegar búið var að fjarlægja hjörtun úr fiskunum.

Vel heppnuð skólakynning

Kristinn Ingi, María og Bjarni Þór

Kristinn Ingi tilbúinn með kynningarspjöldin

Skólinn var með bás á framhaldsskólakynningu í Laugardalshöll um helgina. Það voru Sigurbjörn Árni skólameistari, María námsráðgjafi og Kristinn Ingi kerfisstjóri í aðalhlutverkum og nutu stuðnings nokkurra fyrrverandi nemenda skólans. Mikil aðsókn var í kynningarnar og voru margir áhugasamir um skólann okkar. Við þökkum þeim nemendum sem aðstoðuðu við kynninguna kærlega fyrir þeirra framlag.

Framhaldsskólakynning í Laugardalshöll

Mín framtíð – Framhaldsskólakynning & Íslandsmót verk- og iðngreina 2017

Sigurbjörn Árni skólameistari verður m.a. á svæðinu á fimmtudag og föstudag. Hann getur lýst fyrir ykkur Framhaldsskólanum á Laugum. (Myndin er fengin frá ruv.is)

Framhaldsskólakynning verður haldin dagana 16. – 18. mars 2017 í Laugardalshöllinni. Þarna gefst einstakt tækifæri til að kynna sér fjölbreytt námsframboð framhaldsskóla landsin en starfsfólk og nemendur 26 skóla munu miðla upplýsingum og fróðleik um námið, félagslífið og framtíðarmöguleikana.

Á sama tíma fer fram í Höllinni Íslandsmót iðn- og verkgreina. Um 150 keppendur munu taka þátt í Íslandsmótinu og keppt verði í 21 iðngrein. Nokkrar greinar til viðbótar verða með kynningu á störfum en alls taka 27 iðn- og verkgreinar þátt  í ár. Fagreinarnar bjóða einnig upp á „Prófaðu“ svæði þar sem gestir fá að fikta, smakka og upplifa.

Von er á um 8 þúsund grunnskólanemendum í 9. – 10. bekk alls staðar af landinu í Höllina til að kynna sér námsmöguleika og fjölbreytni iðngreina. Þessi heimsókn er hugsuð sem liður í náms- og starfsfræðslu þessara nemenda og einn liður í að styrkja nemendur í að taka upplýsta ákvörðun um náms- og starfsval.

Á laugardeginum eru fjölskyldur sérstaklega velkomnar. Gefst þá einstakt tækifæri til að snerta og upplifa ýmislegt skemmtilegt sem snertir nám og störf í iðn- og verkgreinum. Team Spark kynnir rafmagnsbíl og einnig verður í boði að smakka upp á kræsingar sem útbúnar hafa verið í keppninni.

Dagskráin fer fram í Laugardalshöll og er opið fyrir gesti sem hér segir:

  • Fimmtudaginn 16. mars kl. 9 – 16
  • Föstudaginn 17. mars kl. 9 – 16
  • Laugardaginn 18. mars kl. 10 – 14
    • Laugardagurinn er fjölskyldudagur, fræðsla og fjör

Allir velkomnir – enginn aðgangseyrir!

Afreksþjálfun fyrir nemendur

Nemendum sem stunda keppnisíþróttir stendur til boða að taka áfanga í afreksþjálfun samhliða hefðbundnu námi. Það er áfangi sem býður uppá persónulega þjálfun fyrir keppnisfólk í hvaða íþróttagrein sem er. Þar býðst nemendum að sækja 2 – 3 æfingar í viku hjá íþróttakennara en þær æfingar eru settar inní stundatölfu nemenda þar sem best hentar. Hver og einn nemandi fær æfingaáætlun til að vinna eftir, en hún er sett upp af íþróttakennara í samráði við þjálfara viðkomandi nemanda. Þessi áætlun tekur breytingum eftir því sem líður á veturinn og tekur mið af mótum og stöðu nemandans á æfingar-/keppnistímabilinu. Reglulega eru svo teknar mælingar til að fylgjast með árangri æfinganna bæði sem hvatning fyrir nemendur sjálfa og einnig til að meta hvort breyta þurfi æfingaáætlun og áherslum.

Á þessari önn eru 9 nemendur sem sækja afreksþjálfun með þessum hætti. Þessir nemendur eru að stunda knattspyrnu, sund og frjálsar íþróttir hjá sínum íþróttafélögum.

Auk þess að vera í afreksþjálfun hafa nemendur fullan aðgang að góðri líkamsræktaraðstöðu skólans, sundlaug og íþróttasal þeim að kostnaðarlausu.

Kynning á íslenskunámi við HÍ

Mynd: Hallur B. Reynisson

Á dögunum kom Ásta Kristín Benediktsdóttir í heimsókn til okkar til að kynna fyrir nemendum íslenskunám við Háskóla Íslands. Nemendur sem farnir eru að nálgast útskrift sóttu kynninguna. Gott framtak hjá HÍ og nauðsynlegt að nemendur fái kynningar á því sem er í boði eftir að skólagöngu líkur á framhaldsskólastiginu.

Tónkvíslin haldin með miklum glæsibrag

Mikið var um dýrðir á laugardagskvöldið þegar Tónkvíslin fór fram. Alls voru 21 atriði sem tóku þátt en keppt var bæði í grunnskólakeppni og framhaldsskólakeppni. Keppnin var sýnd í beinni útsendingu á sjónvarpsstöðinni N4 og því mikið lagt í að hafa keppnina sem glæsilegasta. Nemendur skólans fengust við ýmis verkefni á meðan keppnin fór fram, voru á myndavélum, sáu um sviðsstjórn, kynningar og fleira sem gera þurfti til að allt gengi sem best fyrir sig.

 

Gabríela Sól Magnúsdóttir og Friðrika Bóel Jónsdóttir stóðu uppi sem sigurvegarar í lok kvölds en allir keppendur eiga þó hrós skilið fyrir frábæra frammistöðu. Kristinn Ingi, tölvuumsjónarmaður skólans, var á staðnum og tók þessar myndir sem segja meira en mörg orð.

 

2 dagar í Tónkvíslina

Tæknidótið kom í morgun og hefur vinna dagsins að mestu leiti farið í að koma upp sem flestum ljósum og hátölurum eins og húsið ber. Það er fyrirtækið Exton sem hefur umsjón með þessum þætti Tónkvíslarinnar og hafa sömu tæknimennirnir á þeirra vegum komið og unnið við Tónkvísl í mörg ár og eru orðnir nokkuð heimavanir.

Sjónvarpsstöðin N4 mun sýna beint frá keppninni á laugardaginn og hefst útsending kl. 19:30.